有一日，一個年輕人起身返工，

唔再係「撐多一日」，

而係知道自己今日要做嘅事，

同自己在乎的東西，係連住嘅。

起步既階段佢未必賺好多錢，

但佢養得起自己，

唔需要為咗生存而出賣自己覺得重要嘅嘢；

佢未必樣樣叻，

但佢知道自己嘅天賦喺邊度，

而且喺一個容許佢發揮嘅位置上。

佢未必冇壓力，

但佢可以喺辛苦嘅時候，對自己講一句：

「呢條路係我揀嘅，我願意行落去。」

呢個，就係一個人嘅彼岸：

唔係冇風浪，而係知道自己駛緊去邊。

有一日，一個父母同仔女坐低傾前途，

唔再係「你一定要讀呢科」，

而係：「你最近發現自己鍾意啲咩？我哋一齊睇吓。」

屋企人仍然會擔心，

但擔心嘅方式唔同咗——

唔再係「你唔聽我講就會出事」，

而係「我信你會負責任咁試，我會喺度 support 你，家係你既避風港，係你既後盾同堡壘」。

仔女唔再需要反叛先至可以做自己，

父母唔再需要控制先至覺得安心。

呢個，就係一個家庭嘅彼岸：

愛，唔再用恐懼包裝。

有一日，一個學生喺學校裡面，

唔再只係被教「點樣考高分」，

而係被問：「你係一個點樣嘅人？你想用咩方式參與呢個世界？」

學校有空間做小實驗、做探索、做失敗；

老師唔只係出卷嘅人，而係陪行嘅人；

成績表唔係人生嘅判決書，而係其中一份參考資料。

呢個，就係一間學校嘅彼岸：

教育嘅目標，唔係篩走人，而係幫每個人發光。

有一日，「你做咩㗎？」呢個問題，

唔再係用嚟秤你值幾多錢，

而係出於好奇：「你用緊咩方式，同呢個世界互動？」

一個做社工嘅人，同一個做 banker 嘅人，

會被同樣尊重——

因為社會終於明白：

價值唔係用人工高低嚟排名嘅。

創業嘅人唔需要燒盡自己先至叫「拼搏」；

打工嘅人唔需要放棄所有夢想先至叫「成熟」；

休息嘅人唔需要內疚先至叫「正常」。

每個人都有基本空間去問自己：「我想點樣活？」

而唔係被迫用一生去答：「我點樣先至唔會餓死？」

呢個，就係一個社會嘅彼岸：

豐盛，唔係少數人嘅專利；

幸福，唔再係奢侈品。

做咗多年教育之後，

退隱江湖看看山看看海期間，

偶爾會收到「徒兒徒孫」或者經理們既SMS，內容大致如下：

「我（佢）搵到喇！未必係完美嘅工作，但係一份我自己都尊重嘅工作，收入照顧到自己既生活；我每日起身有期待感，知道自己做緊嘅事對自己同對其他人都有意義。同你分享番～」

我希望每一個人，都可以用自己嘅方式，

做一份對得起自己、也對世界有益的工作，

然後帶住尊嚴同光，好好咁活落去。

我既每個對話、每個培訓、每個教育項目、每個團、甚至乎每一條村，

都係起緊一條通往幸福既橋樑——

幫到更多人由原本既位置，

通往佢地專屬的幸福彼岸。